جديد صوناد صفاقس : حريفان يحملان نفس رقم الفاتورة !!

كتب اليوم الدكتور محمد منير بن عمر على صفحته الخاصة لينقل لكم حكايته مع الشركة الوطنية لاستغلال وتوزيع المياه :

ماذا يحدث في حواسيب “السّوناد” ؟
– مخّ الهدرة : طلع عندي شريك في كومتور الماء متاع داري لا نعرفو لايعرفني !!!!!

– التّفاصيل(للّي يحبّ يوسّع بالو ويقرا أطوار ها الغريبة)a
نهار الأربعاء 19 أكتوبر، كيما تعرفو الكل، قصّ الماء متاع الجعب “الغير الصّالح للشّراب” على برشا مناطق في صفاقس منها صفاقس الجنوبيّة. وبما أنّو الحكاية هذي خبّرو عليها، خذينا الاحتياطات اللازمة ووسّعنا بالنا وقلنا هذي أشغال وليها تضحيّاتها… المهمّ قلنا توّا يرجع الماء غدوة… والّي ما دوّش غدوة يدوّش والماعون الّي ما تغسلش غدوة نغسلوه… والدّار موش تتمسّخ شويّة.. أمّا موش مشكل كبير… نهارتها العشيّة، الماء بدا يرجع عند الجيران بالشويّة بالشويّة… وما رجعش في الدّار… قلقنا شويّة.. أمّا قلنا لاباس.. لازم توّا يرجع
نهار الخميس الصباح، قمنا ما لقيناش ماء في السبابل… شفنا جيراننا، قالو الكل الي الماء رجع كيما العادة… عجب؟ شنيّا الحكاية ؟؟ طلبت السّوناد، السيد كلمني قتلو كيفاش؟ قلّي هات نومرو الكومتور… قتلو “15119”… ضرب على الفلِس الّي قدّامو..وقلّي “هذا آهو ماهوش خالص ليه مدّة، وصحيح، احنا قصّينا عليك الماء، ايجا سوّي وضعيتك… راك مسال في 407 دينارات وشويّة ومعاهم خطيّة سمحة بـ 17 دينار واش”… كيفاش؟ راني التسكرة الي تجيني نخلّصها.. قليّ “هاذاكاهو” وسيبني.
انا الفاتورات الكلّ تجيني للبيرو… والسكرتيرة تلمّدهم.. وكلّ 15 يوم نعطيها تمشي تخلصهم… ايّا طلبت البيرو… “يا بنتي كيفاش تجي تسكرة الماء متاع الدار وما تخلصوهاش؟” قاتلي ما تقول ها الكلام… ما ثمّا حتّى تسكرة جات وما خلصتش… “باهي صوّرلي آخر فاتورة خالصة وابعثهالي”.. وهاكا الي صار… نلقا تاريخ التسكرة صارلو أكثر من عام… قلت “اتهردت عليّا… هذا البوسطاجي عملها فيّا.. وما وصّلهاش للبيرو”
ايّا جريت للسّوناد باش “نسوّي وضعيتي” كيما قالّي السيّد في التلفون… ومالعشرة ما كان يوصلّي الطّريق كان مع نصف النّهار… وانا مسيّب أموري… وخدمتي…والعصب يهزّ فيّا ويحطّ… ونشوف في عجايب الإدارة قدّامي.. وصلت للموظّف، وقتلو الحكاية، وقتلو الي آنا جاي باش نخلّصهم.. طلب مني رقم الكومتور… 15119… قلّي “اتفضّل أقعد سي ناجح…”…. قتلو “بون…مانيش ناجح برشا… أمّا آني قعدت”… بدا يضرب على الكلافييه.. وآنا نشوف في الشّاشة، لقيت إسم صاحب العدّاد “ناجح بن………..”…. زدت ثبّتّ، وقتلو سامحني، راني اسمي “محمّد منير بن عمر… وموش ناجح بن……..”… قلّي كيفاش؟ عوّد ملّ عليّا رقم الكومتور… عوّدتلو النّومرو… اختفات الصفحة وظهرت من جديد “ناجح بن ….” نفس رقم الكومتور.. نفس العنوان… قلّي بلكش نومرو الكومتور غالط … وريتو الفاتورة الّي عندي… شافها وثبت… يلقا النّومرو صحيح… قالّي هات بطاقة التّعريف متاعك.. مديتهالو… خرج مالتّطبيقة الي قدّامو.. ودخل تطبيق آخر… حطّ نومرو بطاقة التّعريف متاعي… تظهر صفحة أخرى فيها اسمي… ونفس رقم الكومتور…………………. سكتّ السيّد، وقعد يغزر لبطاقة التعريف.. وللتّسكرة… وللشاشة الّي قدّامو… قتلو “سيدنا كيفاش الحكاية هذي ؟ نفس رقم العدّاد لزوز أشخاص ؟؟؟” … قلّي أكيد ثمّا غلطة… ماعملتش “ميتاسيون” ؟ ”mutation“… قتلو “لا عملت ميتاسيون لا والو… وآنا ملّي جيتكم لوّل مرّة وقت دخّلت الماء عام 2005، مارجعتش هوني… وحتى اسمي كنتو تبعثوهولي ناقص ما سهلش ربي وجيت باش تكمّلو تصلّحوه ….وآهي فرصة، امّا الحكاية هذي كيفاش؟” الحاصيلو السّيّد ماجاوبنيش على السّؤال.. وقلّي “مش مشكل توّا نصلّحوها”… قتلو “مالا هاذاكا علاش الفاتورة ما كانتش توصلّي… وهاذاكا كيفاش تلمّدو الفاتورات الّي موش خالصين… تبعثو فيهم لسي ناجح بن …… الّي ماهوش موجود لا في النهج ولا في الحيّ… الحاصيلو… السيّد ما لقا ما يقلّي… وصلّح الإسم، وقلّي باهي أوكا صلّحناها، برّا توّا خلّص 407 لاف واش.. وماش تزيد تخلّص 17 ألف واش حقّ قصّان الماء وترجيعو… باللّه؟ انتوما تغلطو وآنا نزيد نخلّص خطيّة؟ ضحك وقلّي “هذيكا الإجراءات… ما كانشي شوف مع الإدارة لداخل”… ما عادش عليّا وقت…… وتعبت… مشيت خلّصت كي النّاس الملاح… ورجع الماء… والحمد للّه؟
لعشيّة تعدّيت لفحّام الحومة… ولقيت الفاتورة متاع سي “ناجح” في كدس الجوابات الذي يلوّحوها عندو البوسطاجي.. وجماعة الستاغ وجماعة السوناد… وتأكّدت الّي نومرو الكومتور هو بيدو نومرو كومتوري….. ويريريري….
قعد في بالي أربعة أسئلة ؟؟؟؟؟
سؤال 1 : كيفاش ينجّم نفس رقم كومتور مازال يخدم يتّعطى لزوز مواطنين في نفس الوقت وبها السّهولة ؟
سؤال 2 : باهي آنا خلّصت… والسيّد الآخر قاعد يخلّص في الماء ولاّ لا ؟
سؤال 3 : قدّاش زعمة ثمّا من حالة كيما هذي في صفاقس… وفي برّ تونس ؟
السّؤال الرّابع مانيش ماش نقولو……………علخاطرو ما يتقالش………….خلّي الدّولة تخدم !!!!